ಪಾಕಿಸ್ತಾನದ ವಿಶ್ವಾಸಾರ್ಹತೆಯ ಬಗ್ಗೆ ಇದೆ ಹಲವು ಅನುಮಾನ
ವಾಷಿಂಗ್ಟನ್ : ಅಮೆರಿಕ-ಇಸ್ರೇಲ್-ಇರಾನ್ ಕದನ ವಿರಾಮಕ್ಕೆ ನಾನು ಕಾರಣ ಎಂದು ಪಾಕಿಸ್ತಾನ ಹೇಳಿಕೊಳ್ಳುತ್ತಿದ್ದರೂ ಅದರ ಪಾತ್ರದ ಬಗ್ಗೆ ನಾನಾ ರೀತಿಯ ಗುಮಾನಿಗಳು ಎದ್ದಿವೆ. ಆರಂಭದಲ್ಲೇ ಪಾಕಿಸ್ತಾನ ಟ್ವೀಟ್ ಮಾಡಿ ಎಡವಟ್ಟು ಮಾಡಿಕೊಂಡಿತ್ತು. ಇದು ಅಮೆರಿಕ ರಚಿಸಿಕೊಟ್ಟ ಟ್ವೀಟ್ ಸಂದೇಶ ಎಂಬುದಕ್ಕೆ ಸ್ವತಹ ಪಾಕಿಸ್ತಾನವೇ ಸಾಕ್ಷಿ ಒದಗಿಸಿತ್ತು. ಇದೀಗ ಅಮೆರಿಕವೇ ಕದನ ವಿರಾಮದಲ್ಲಿ ಪಾಕಿಸ್ತಾನ ಸಂಧಾನಕಾರನ ಪಾತ್ರ ನಿಭಾಯಿಸಿಲ್ಲ, ಬದಲಾಗಿ ಬರೀ ಸಂದೇಶ ವಾಹಕನಾಗಿ ಕಾರ್ಯನಿರ್ವಹಿಸಿದೆ ಎಂದು ಹೇಳುತ್ತಿದೆ.
ಜಾಗತಿಕ ರಾಜಕೀಯದಲ್ಲಿ ಅಮೆರಿಕ ಮತ್ತು ಇರಾನ್ ನಡುವಿನ ಎರಡು ವಾರಗಳ ಕದನ ವಿರಾಮವು ಒಂದು ಅಚ್ಚರಿಯ ಬೆಳವಣಿಗೆಯಾಗಿ ಹೊರಹೊಮ್ಮಿದೆ. ಆದರೆ, ಈ ಶಾಂತಿ ಪ್ರಕ್ರಿಯೆಯ ಹಿಂದೆ ಯಾರ ಕೈವಾಡವಿದೆ ಎಂಬ ಪ್ರಶ್ನೆ ಈಗ ದೊಡ್ಡ ರಾಜತಾಂತ್ರಿಕ ಸಂಘರ್ಷಕ್ಕೆ ನಾಂದಿ ಹಾಡಿದೆ. ಪಾಕಿಸ್ತಾನವು ತನಗೆ ಬೇಕಾದಂತೆ ವಿಚಾರಗಳನ್ನು ತಿರುಚಿದೆ ಎನ್ನುವ ಆರೋಪ ಕೇಳಿಬಂದಿದೆ. ಲೆಬನಾನ್ ಮೇಲೆ ದಾಳಿ ಮಾಡಬೇಡಿ ಎನ್ನುವ ಷರತ್ತು ಕೂಡ ಅಮೆರಿಕಕ್ಕೆ ಇರಾನ್ ನೀಡಿದ್ದ ಷರತ್ತುಗಳ ಪಟ್ಟಿಯಲ್ಲಿತ್ತು ಎಂದು ಇರಾನ್ ಹೇಳಿದೆ ಆದರೆ ಅಮೆರಿಕ ಹೇಳುವ ಪ್ರಕಾರ ಆ ಪಟ್ಟಿಯಲ್ಲಿ ಲೆಬನಾನ್ ಹೆಸರಿರಲಿಲ್ಲ. ಇದರಲ್ಲಿ ಪಾಕಿಸ್ತಾನದ ಕೈವಾಡವಿರುವುದು ಸ್ಪಷ್ಟವಾಗುತ್ತಿದೆ.
ಪಾಕಿಸ್ತಾನ ವಿಶ್ವಾಸಾರ್ಹವಲ್ಲ ಈ ಇಡೀ ನಾಟಕದ ಕೇಂದ್ರ ಬಿಂದುವಾಗಿ ಇಸ್ಲಾಮಾಬಾದ್ ತನ್ನನ್ನು ತಾನು ಬಿಂಬಿಸಿಕೊಳ್ಳುತ್ತಿದೆ. ಆದರೆ ಇಸ್ರೇಲ್ ಇದನ್ನು ಸ್ಪಷ್ಟವಾಗಿ ತಳ್ಳಿಹಾಕಿದೆ. ಭಾರತದಲ್ಲಿನ ಇಸ್ರೇಲ್ ರಾಯಭಾರಿ ರುವೆನ್ ಅಜರ್ ಅವರು ಪಾಕಿಸ್ತಾನದ ವಿಶ್ವಾಸಾರ್ಹತೆಯನ್ನು ಬಹಿರಂಗವಾಗಿಯೇ ಪ್ರಶ್ನಿಸಿದ್ದಾರೆ.
ನಾವು ಪಾಕಿಸ್ತಾನವನ್ನು ಒಬ್ಬ ವಿಶ್ವಾಸಾರ್ಹ ಆಟಗಾರನಾಗಿ ನೋಡುವುದಿಲ್ಲ. ಹಿಂದೆ ಅಮೆರಿಕವು ಕತಾರ್ ಅಥವಾ ಟರ್ಕಿಯಂತಹ ರಾಷ್ಟ್ರಗಳ ಮೂಲಕ ಅನಿವಾರ್ಯವಾಗಿ ಮಾತುಕತೆ ನಡೆಸಿರಬಹುದು, ಆದರೆ ಅದರ ಅರ್ಥ ಪಾಕಿಸ್ತಾನದ ಪಾತ್ರಕ್ಕೆ ಸಿಕ್ಕ ಅನುಮೋದನೆ ಎಂದಲ್ಲ, ಎಂದು ಅಜರ್ ಗುಡುಗಿದ್ದಾರೆ. ಅವರ ಪ್ರಕಾರ, ಅಮೆರಿಕದ ನಿರ್ಧಾರಗಳು ಕೇವಲ ಕಾರ್ಯತಂತ್ರದ ಆಯ್ಕೆಗಳೇ ಹೊರತು ಪಾಕಿಸ್ತಾನದ ಮೇಲಿನ ನಂಬಿಕೆಯಲ್ಲ.
ಪ್ರಧಾನಿ ಷರೀಫ್ ಅವರ ನಡೆ ಪಾಕಿಸ್ತಾನದ ಪ್ರಧಾನಿ ಶೆಹಬಾಜ್ ಷರೀಫ್ ಮತ್ತು ಸೇನಾ ಮುಖ್ಯಸ್ಥ ಫೀಲ್ಡ್ ಮಾರ್ಷಲ್ ಅಸಿಮ್ ಮುನೀರ್ ಈ ಕದನ ವಿರಾಮದ ಸಂಪೂರ್ಣ ಕ್ರೆಡಿಟ್ ಪಡೆಯಲು ಹವಣಿಸುತ್ತಿದ್ದಾರೆ. ಆದರೆ ಕದನ ವಿರಾಮ ಘೋಷಣೆಯಾಗುವ ಕೆಲವೇ ಗಂಟೆಗಳ ಮೊದಲು ಷರೀಫ್ ಅವರು ಮಾಡಿದ ಸಾಮಾಜಿಕ ಜಾಲತಾಣದ ಪೋಸ್ಟ್ ಈಗ ಅವರಿಗೆ ಉರುಳಾಗಿದೆ. ರಾಜತಾಂತ್ರಿಕತೆಗಾಗಿ ಅವರು ನೀಡಿದ ಕರೆ, ಒಪ್ಪಂದದ ಸಾರಾಂಶಕ್ಕಿಂತ ಹೆಚ್ಚಾಗಿ ಪ್ರಚಾರದ ಹಪಾಹಪಿಯಂತೆ ಕಾಣುತ್ತಿದೆ ಎಂದು ತಜ್ಞರು ವಿಶ್ಲೇಷಿಸುತ್ತಿದ್ದಾರೆ.
ಅಮೆರಿಕದ ಜೋನಾಥನ್ ಸ್ಕ್ಯಾಂಜರ್ ಪಾಕಿಸ್ತಾನದ ಈ ಹಠಾತ್ ‘ಶಾಂತಿ ದೂತ’ನ ಅವತಾರದ ಹಿಂದೆ ಚೀನಾದ ನೆರಳು ಇರುವುದನ್ನು ಪತ್ತೆಹಚ್ಚಿದ್ದಾರೆ. ಪಾಕಿಸ್ತಾನವು ಚೀನಾದ ‘ಬೆಲ್ಟ್ ಆಂಡ್ ರೋಡ್ ಇನಿಶಿಯೇಟಿವ್’ ಅಡಿಯಲ್ಲಿ ಸಾಲದ ಸುಳಿಯಲ್ಲಿ ಸಿಲುಕಿದೆ. ಪಾಕಿಸ್ತಾನವು ಸ್ವತಂತ್ರವಾಗಿ ಕಾರ್ಯನಿರ್ವಹಿಸುತ್ತಿಲ್ಲ, ಬದಲಾಗಿ ಚೀನಾದ ಆಜ್ಞೆಯಂತೆ ಒಂದು ಮುಖವಾಣಿಯಾಗಿ ಕೆಲಸ ಮಾಡುತ್ತಿದೆ ಎಂಬುದು ಸ್ಕ್ಯಾಂಜರ್ ವಾದ. ಖುದ್ದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಕೂಡ ಇರಾನ್ ಅನ್ನು ಒಪ್ಪಿಸುವಲ್ಲಿ ಚೀನಾ ಪ್ರಮುಖ ಪಾತ್ರ ವಹಿಸಿದೆ ಎಂದು ಸುಳಿವು ನೀಡಿರುವುದು ಈ ವಾದಕ್ಕೆ ಪುಷ್ಟಿ ನೀಡಿದೆ.
ಜೆ.ಡಿ. ವ್ಯಾನ್ಸ್ ಮತ್ತು ಆಂತರಿಕ ಗೊಂದಲ ಅಮೆರಿಕದ ಆಡಳಿತದ ಒಳಗೂ ಎಲ್ಲವೂ ಸರಿಯಿದ್ದಂತಿಲ್ಲ. ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್ ಅವರಿಗೆ ಈ ಒಪ್ಪಂದದ ಬಗ್ಗೆ ತಡವಾಗಿ ಮಾಹಿತಿ ನೀಡಲಾಗಿದೆ ಎಂಬ ವರದಿಗಳು ವಾಷಿಂಗ್ಟನ್ನ ಆಂತರಿಕ ರಾಜಕೀಯದ ಓರೆಕೋರೆಗಳನ್ನು ಬಯಲು ಮಾಡಿವೆ. ವಿದೇಶಿ ಹಸ್ತಕ್ಷೇಪದ ಬಗ್ಗೆ ಕಟುವಾದ ನಿಲುವು ಹೊಂದಿರುವ ವ್ಯಾನ್ಸ್ ಅವರನ್ನು ಈ ಪ್ರಕ್ರಿಯೆಯಿಂದ ದೂರ ಇಟ್ಟಿರುವುದು ಹಲವು ಅನುಮಾನಗಳಿಗೆ ಕಾರಣವಾಗಿದೆ.
ಶಾಂತಿ ಕೇವಲ ತಾತ್ಕಾಲಿಕವೇ? ಎರಡು ವಾರಗಳ ಕಾಲ ಬಾಂಬ್ ದಾಳಿ ನಿಲ್ಲಬಹುದು, ಆದರೆ ಇರಾನ್ನ ಪ್ರಾಕ್ಸಿ ನೆಟ್ವರ್ಕ್ಗಳಾದ ಹಮಾಸ್, ಹೆಜ್ಬೊಲ್ಲಾ ಮತ್ತು ಹೌತಿಗಳ ಭೀತಿ ಇನ್ನೂ ಹಸಿರಾಗಿದೆ. ಈ ಉಗ್ರಗಾಮಿ ಸಂಘಟನೆಗಳ ಮೂಲವನ್ನು ಸರಿಪಡಿಸದ ಹೊರತು ಈ ಕದನ ವಿರಾಮವು ಕೇವಲ ಚಂಡಮಾರುತದ ಮುನ್ನ ಇರುವ ಶಾಂತಿಯಂತೆಯೇ ಎಂಬುದು ತಜ್ಞರ ಎಚ್ಚರಿಕೆ.