ಜಗತ್ತಿನ ಬಲಾಢ್ಯ ಮಿಲಿಟರಿ ಶಕ್ತಿಗೆ ಭಾರಿ ಹೊಡೆತ ನೀಡಿದ ಇರಾನ್
ವಾಷಿಂಗ್ಟನ್: ಇರಾನ್ ವಿರುದ್ಧ ಅಮೆರಿಕ ಆರಂಭಿಸಿದ್ದ ‘ಆಪರೇಶನ್ ಎಪಿಕ್ ಫ್ಯೂರಿ’ ಕಾರ್ಯಾಚರಣೆ ಅಮೆರಿಕ ಸೇನೆಗೆ ಭಾರಿ ನಷ್ಟವನ್ನುಂಟುಮಾಡಿದೆ ಎಂಬ ಮಾಹಿತಿಯೊಂದು ಹೊರಬಿದ್ದಿದೆ. ಅಮೆರಿಕ ಸಂಸತ್ತಿನ ಅಧೀನದಲ್ಲಿರುವ ಸಂಸತ್ತೀಯ ಸಂಶೋಧನಾ ಸೇವೆ (CRS) ಬಿಡುಗಡೆ ಮಾಡಿದ ವರದಿ ಪ್ರಕಾರ, ಫೆಬ್ರವರಿ 28ರಿಂದ ಆರಂಭವಾದ ಈ ಸೈನಿಕ ಕಾರ್ಯಾಚರಣೆಯಲ್ಲಿ ಅಮೆರಿಕದ ಒಟ್ಟು 42 ಯುದ್ಧ ವಿಮಾನಗಳು ಮತ್ತು ಡ್ರೋನ್ಗಳು ಹಾನಿಗೊಳಗಾಗಿವೆ ಅಥವಾ ನಾಶವಾಗಿವೆ.
ಈ ವರದಿ ಹೊರಬಿದ್ದ ಬಳಿಕ ಅಮೆರಿಕದ ಸೈನಿಕ ಸಾಮರ್ಥ್ಯ, ಯುದ್ಧ ತಂತ್ರ ಮತ್ತು ಭಾರಿ ವೆಚ್ಚದ ಕುರಿತ ಚರ್ಚೆಗಳು ತೀವ್ರಗೊಂಡಿವೆ. ವರದಿಯಲ್ಲಿ ಉಲ್ಲೇಖಿಸಿರುವ ಅಂಕಿಅಂಶಗಳ ಪ್ರಕಾರ, ನಾಲ್ಕು F-15E ಸ್ಟ್ರೈಕ್ ಈಗಲ್ ಯುದ್ಧ ವಿಮಾನಗಳು, ಅತ್ಯಾಧುನಿಕ ತಂತ್ರಜ್ಞಾನ ಹೊಂದಿರುವ ಒಂದು F-35A ಲೈಟ್ನಿಂಗ್-II ಫೈಟರ್ ಜೆಟ್, ಒಂದು A-10 ಥಂಡರ್ಬೋಲ್ಟ್ ವಿಮಾನ, ಏಳು KC-135 ಸ್ಟ್ರಾಟೋ ಟ್ಯಾಂಕರ್ ಇಂಧನ ಪೂರೈಕೆ ವಿಮಾನಗಳು, ಒಂದು E-3 ಸೆಂಟ್ರಿ AWACS ಮೇಲ್ವಿಚಾರಣಾ ವಿಮಾನ, ಎರಡು MC-130J ಕಮಾಂಡೋ-II ವಿಶೇಷ ಕಾರ್ಯಾಚರಣೆ ವಿಮಾನಗಳು ಹಾಗೂ ಒಂದು HH-60W ಜಾಲಿ ಗ್ರೀನ್-II ಹೆಲಿಕಾಪ್ಟರ್ ಕಾರ್ಯಾಚರಣೆಯಲ್ಲಿ ಹಾನಿಗೊಳಗಾಗಿವೆ.
ಅದರ ಜೊತೆಗೆ ಅಮೆರಿಕಾದ ಡ್ರೋನ್ ವ್ಯವಸ್ಥೆಯ ಮೇಲೂ ಭಾri ಹೊಡೆತ ಬಿದ್ದಿದೆ. 24 MQ-9 ರೀಪರ್ ಡ್ರೋನ್ಗಳು ಮತ್ತು ಒಂದು MQ-4C ಟ್ರಿಟಾನ್ ಡ್ರೋನ್ ನಾಶವಾಗಿರುವ ಅಥವಾ ಬಳಕೆಗೆ ಅಸಮರ್ಥವಾಗಿರುವ ಮಾಹಿತಿ ವರದಿಯಲ್ಲಿ ಉಲ್ಲೇಖವಾಗಿದೆ. ವಿಶೇಷವಾಗಿ MQ-9 ರೀಪರ್ ಡ್ರೋನ್ಗಳು ಅಮೆರಿಕದ ಅತ್ಯಂತ ಪ್ರಮುಖ ನಿಗಾವ್ಯವಸ್ಥೆ ಹಾಗೂ ದಾಳಿ ಸಾಮರ್ಥ್ಯ ಹೊಂದಿರುವ ಡ್ರೋನ್ಗಳಾಗಿದ್ದು, ಅವುಗಳ ನಷ್ಟ ಅಮೆರಿಕದ ಕಾರ್ಯಾಚರಣಾ ಸಾಮರ್ಥ್ಯಕ್ಕೆ ದೊಡ್ಡ ಹಿನ್ನಡೆಯಾಗಿ ಪರಿಗಣಿಸಲಾಗುತ್ತಿದೆ.
CRS ತನ್ನ ವರದಿಯಲ್ಲಿ ಈ ಮಾಹಿತಿಯನ್ನು ಅಮೆರಿಕ ರಕ್ಷಣಾ ಇಲಾಖೆ, ಸೆಂಟ್ರಲ್ ಕಮಾಂಡ್ ಹಾಗೂ ವಿವಿಧ ಮಾಧ್ಯಮ ವರದಿಗಳ ಆಧಾರದ ಮೇಲೆ ಸಂಗ್ರಹಿಸಲಾಗಿದೆ ಎಂದು ತಿಳಿಸಿದೆ. ಯುದ್ಧ ಇನ್ನೂ ಮುಂದುವರಿಯುತ್ತಿರುವುದರಿಂದ, ಅಂತಿಮ ನಷ್ಟದ ಅಂಕಿಅಂಶಗಳಲ್ಲಿ ಬದಲಾವಣೆ ಸಂಭವಿಸಬಹುದು ಎಂದೂ ತಿಳಿಸಲಾಗಿದೆ.
ಈ ನಡುವೆ ಇರಾನ್ ವಿರುದ್ಧದ ಸೈನಿಕ ಕಾರ್ಯಾಚರಣೆಗಳಿಂದ ಉಂಟಾಗುತ್ತಿರುವ ಆರ್ಥಿಕ ಹೊರೆ ಅಮೆರಿಕ ಸರ್ಕಾರಕ್ಕೆ ಮತ್ತೊಂದು ದೊಡ್ಡ ಸವಾಲಾಗಿ ಪರಿಣಮಿಸಿದೆ. ಮೇ 12ರಂದು ನಡೆದ ಹೌಸ್ ಅಪ್ರೊಪ್ರಿಯೇಷನ್ಸ್ ಸಬ್ಕಮಿಟಿ ಸಭೆಯಲ್ಲಿ ಪೆಂಟಗನ್ ಕಾರ್ಯನಿರ್ವಹಣಾ ಲೆಕ್ಕಪತ್ರಾಧಿಕಾರಿ ಜೂಲ್ಸ್ ಡಬ್ಲ್ಯೂ. ಹರ್ಸ್ಟ್ III ಮಾತನಾಡಿ, ಯುದ್ಧೋಪಕರಣಗಳ ದುರಸ್ತಿ ಮತ್ತು ಬದಲಾವಣೆಯ ವೆಚ್ಚಗಳು ನಿರೀಕ್ಷೆಗಿಂತ ಹೆಚ್ಚಾಗಿವೆ ಎಂದು ಹೇಳಿದ್ದಾರೆ. ಹೀಗಾಗಿ ಇರಾನ್ ವಿರುದ್ಧದ ಯುದ್ಧ ಕಾರ್ಯಾಚರಣೆಗಳ ಒಟ್ಟು ವೆಚ್ಚ ಈಗಾಗಲೇ 29 ಬಿಲಿಯನ್ ಡಾಲರ್ಗೆ ಏರಿಕೆಯಾಗಿದೆ ಎಂದು ಅಮೆರಿಕ ರಕ್ಷಣಾ ಇಲಾಖೆ ಅಂದಾಜಿಸಿದೆ.