ಕ್ಷಮೆ ಯಾಚಿಸದ ಬಳಿಕವೂ ಗಲ್ಫ್ ದೇಶಗಳ ಮೇಲೆ ಇರಾನ್ ದಾಳಿ
ಟೆಹ್ರಾನ್ : ಅಮೆರಿಕ, ಇಸ್ರೇಲ್ ಮತ್ತು ಇರಾನ್ ನಡುವಿನ ಯುದ್ಧ ಎರಡನೇ ವಾರಕ್ಕೆ ಕಾಲಿಟ್ಟಿದ್ದು, ಇರಾನ್ ಹಾಗೂ ಮಧ್ಯಪ್ರಾಚ್ಯದ ಇತರ ದೇಶಗಳಲ್ಲಿ ದಾಳಿಗಳು ಮುಂದುವರಿದಿವೆ. ಇಸ್ರೇಲ್ ಸೇನೆ ಲೆಬನಾನ್ ಮೇಲೂ ಹೆಚ್ಚಿನ ದಾಳಿಗಳನ್ನು ನಡೆಸುತ್ತಿದೆ. ಇಸ್ರೇಲ್-ಅಮೆರಿಕ ಜಂಟಿ ಕಾರ್ಯಾಚರಣೆಗೆ ಇರಾನ್ ಅಷ್ಟೇ ಪ್ರಬಲವಾಗಿ ತಿರುಗೇಟು ನೀಡುತ್ತಿದ್ದು, ಸೋಲು – ಗೆಲುವಿನ ನಿರ್ಧಾರವಾಗುತ್ತಿಲ್ಲ. ಎರಡೂ ಕಡೆಯಿಂದಲೂ ಏಟು-ಎದಿರೇಟು ಬೀಳುತ್ತಿದೆ. ಸದ್ಯಕ್ಕೆ ಈ ಯುದ್ಧ ನಿಲ್ಲುವ ಅಧ್ಯತೆ ಗೋಚರಿಸುತ್ತಿಲ್ಲ
ಈಗಾಗಲೇ ಯುದ್ಧ ಜಗತ್ತಿನ ಮೇಲೆ ಪರಿಣಾಮ ಬೀರಲಾರಂಭಿಸಿದೆ. ತೈಲ ಮತ್ತು ಇಂಧನ ಬೆಲೆ ಏರುಪೇರಾಗುತ್ತಿದ್ದು, ಭಾರತದಲ್ಲಿ ನಿನ್ನೆ ಅಡುಗೆ ಸಿಲಿಂಡರ್ ಬೆಲೆಯನ್ನು ಹೆಚ್ಚಿಸಲಾಗಿದೆ. ಯುದ್ಧ ಇನ್ನಷ್ಟು ವಾರಗಳ ಕಾಲ ಮುಂದುವರಿದರೆ ಪೆಟ್ರೋಲು, ಡೀಸೆಲ್ ಬೆಲೆಯೂ ಹೆಚ್ಚಳವಾಗುವ ಭೀತಿ ಆವರಿಸಿದೆ.
ಕ್ಷಮೆ ಯಾಚಿಸಿದರೂ ದಾಳಿ
ಗಲ್ಫ್ ದೇಶಗಳ ಮೇಲೆ ದಾಳಿ ನಡೆಸಿದ್ದಕ್ಕಾಗಿ ಇರಾನ್ ಅಧ್ಯಕ್ಷ ಕ್ಷಮೆ ಕೇಳಿದ್ದರೂ ನಿನ್ನೆ ರಾತ್ರಿ ಮತ್ತೆ ದಾಳಿ ನಡೆದಿರುವುದು ಅಚ್ಚರಿಗೆ ಕಾರಣವಾಗಿದೆ. ಇರಾನ್ ಕಡೆಯಿಂದ ತೂರಿ ಬಂದ ಹಲವು ಕ್ಷಿಪಣಿಗಳನ್ನು ಹೊಡೆದುರುಳಿಸಿದ್ದೇವೆ ಎಂದು ಸೌದಿ ಅರೇಬಿಯ ಹೇಳಿಕೊಂಡಿದೆ. ಇದು ಅಚ್ಚರಿಗೆ ಕಾರಣವಾಗಿದೆ.
ಇರಾನ್ ಅಧ್ಯಕ್ಷ ಮಸೂದ್ ಕ್ಷಮೆಯಾಚನೆ ಹೊರತಾಗಿಯೂ, ಗಲ್ಫ್ ವಲಯದಲ್ಲಿ ಉದ್ವಿಗ್ನತೆ ಹೆಚ್ಚಾಗಿದೆ. ಶನಿವಾರ ತಡರಾತ್ರಿ ಯುನೈಟೆಡ್ ಅರಬ್ ಎಮಿರೇಟ್ಸ್, ಸೌದಿ ಅರೇಬಿಯಾ, ಕತಾರ್ ಮತ್ತು ಬಹ್ರೇನ್ನ ವಾಯು ರಕ್ಷಣಾ ವ್ಯವಸ್ಥೆಗಳು ಇರಾನ್ನ ಕ್ಷಿಪಣಿ ಮತ್ತು ಡ್ರೋನ್ಗಳನ್ನು ಹೊಡೆದುರುಳಿಸಿವೆ.
ಇರಾನ್ನಲ್ಲಿ ನಾಯಕತ್ವ ಗೊಂದಲ?
ದುಬೈನಲ್ಲಿ ಕ್ಷಿಪಣಿಯನ್ನು ಯಶಸ್ವಿಯಾಗಿ ತಡೆದ ಪರಿಣಾಮವಾಗಿ ಬಿದ್ದ ಅವಶೇಷಗಳಿಂದ ದುಬೈ ಮರಿನಾ ಪ್ರದೇಶದ ಕಟ್ಟಡವೊಂದರ ಮುಂಭಾಗಕ್ಕೆ ಸ್ವಲ್ಪ ಹಾನಿಯಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಯಾವುದೇ ಪ್ರಾಣಾಪಾಯ ಸಂಭವಿಸಿಲ್ಲ. ಇರಾನ್ ಅಧ್ಯಕ್ಷರ ಭರವಸೆಯ ಹೊರತಾಗಿಯೂ, ಅಲ್ಲಿನ ಮಿಲಿಟರಿ ಘಟಕಗಳು ಕಾರ್ಯಾಚರಣೆಯನ್ನು ಮುಂದುವರಿಸುತ್ತಿರುವುದು ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. ಇರಾನ್ ನಾಯಕತ್ವದೊಳಗಿನ ಆಂತರಿಕ ಭಿನ್ನಾಭಿಪ್ರಾಯಗಳು ಇಂತಹ ಗೊಂದಲದ ಸಂದೇಶಗಳಿಗೆ ಕಾರಣವಾಗಿರಬಹುದು ಎನ್ನಲಾಗಿದೆ.
ಇನ್ನಷ್ಟು ನಾಯಕರು ಫಿನಿಷ್- ಟ್ರಂಪ್ ಎಚ್ಚರಿಕೆ
ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಟ್ರೂತ್ ಸೋಷಿಯಲ್ನಲ್ಲಿ ಮಾಡಿರುವ ಪೋಸ್ಟ್ನಲ್ಲಿ ಇನ್ನಷ್ಟು ಇರಾನ್ ಅಧಿಕಾರಿಗಳು ಗುರಿಯಾಗಲಿದ್ದಾರೆ ಎಂದು ಎಚ್ಚರಿಸಿದ್ದಾರೆ. ಇರಾನ್ ಮೇಲೆ ಭಾರಿ ದಾಳಿ ನಡೆಯಲಿದೆ ಎಂದು ಹೇಳಿದ್ದಾರೆ. ಅದೇ ಸಮಯದಲ್ಲಿ ಇರಾನ್ ಅಧ್ಯಕ್ಷ ಮಸೌದ್ ಪೆಜೆಶ್ಕಿಯನ್ ಅವರು ಇದೇ ದಿನ ಮುಂಚಿತವಾಗಿ ನೆರೆ ರಾಷ್ಟ್ರಗಳಿಗೆ ಟೆಹ್ರಾನ್ ನಡೆಸಿದ ದಾಳಿಗಳ ಬಗ್ಗೆ ಕ್ಷಮೆ ಕೇಳಿರುವುದನ್ನೂ ಟ್ರಂಪ್ ಉಲ್ಲೇಖಿಸಿದರು.
ಇರಾನ್ ವಿದೇಶಾಂಗ ಸಚಿವಾಲಯ ಅಮೆರಿಕ ಮತ್ತು ಇಸ್ರೇಲ್ ನಡೆಸುತ್ತಿರುವ ಕ್ರೂರ ಸೈನಿಕ ದಾಳಿಗೆ ಪ್ರತಿಕ್ರಿಯಿಸುವುದು ದೇಶದ ಸ್ವಾಭಾವಿಕ ಸ್ವಯಂರಕ್ಷಣಾ ಹಕ್ಕು ಎಂದು ತಿಳಿಸಿದೆ. ಆಕ್ರಮಣ ನಿಲ್ಲುವವರೆಗೆ ಅಥವಾ ಆಕ್ರಮಣಕಾರರನ್ನು ಗುರುತಿಸಿ ಕ್ರಮ ಕೈಗೊಳ್ಳುವಂತೆ ವಿಶ್ವಸಂಸ್ಥೆ ಭದ್ರತಾ ಮಂಡಳಿ ತನ್ನ ಕರ್ತವ್ಯವನ್ನು ನೆರವೇರಿಸುವವರೆಗೆ ಟೆಹ್ರಾರಾನ್ ಯುದ್ಧವನ್ನು ಮುಂದುವರಿಸುತ್ತದೆ ಎಂದು ಹೇಳಿದೆ.
ಇರಾನ್ನಿಂದ ಉಡಾಯಿಸಲಾದ ಕ್ಷಿಪಣಿ ಮತ್ತು ಡ್ರೋನ್ಗಳನ್ನು ಕತಾರ್, ಬಹ್ರೈನ್ ಮತ್ತು ಯುಎಇ ತಡೆದಿರುವುದಾಗಿ ತಿಳಿಸಿವೆ. ಈ ದಾಳಿಗಳು ಇಸ್ರೇಲ್ ಮತ್ತು ಇತರ ದೇಶಗಳನ್ನು ಗುರಿಯಾಗಿಸಿಕೊಂಡಿರುವ ಬಾಲಿಸ್ಟಿಕ್ ಕ್ಷಿಪಣಿಗಳನ್ನು ನಿಯಂತ್ರಿಸುವ ಅರೆಸೇನಾಪಡೆ Islamic Revolutionary Guard Corps ಮೇಲಿನ ಧರ್ಮಾಧಾರಿತ ಆಡಳಿತದ ನಿಯಂತ್ರಣ ಸೀಮಿತವಾಗಿದೆ ಎಂಬುದನ್ನು ಸೂಚಿಸುತ್ತವೆ.
ಫೆಬ್ರವರಿ 28ರಂದು ನಡೆದ ದಾಳಿಯಲ್ಲಿ ಯುದ್ಧ ಆರಂಭವಾದ ಬಳಿಕ ಅತ್ಯಧಿಕ ನಾಗರಿಕರ ಸಾವು ಸಂಭವಿಸಿದೆ ಎಂದು ವರದಿಯಾಗಿದೆ. ಇದರಿಂದ ವಿಶ್ವಸಂಸ್ಥೆ ಹಾಗೂ ಮಾನವ ಹಕ್ಕುಗಳ ಮೇಲ್ವಿಚಾರಕ ಸಂಘಟನೆಗಳಿಂದ ತೀವ್ರ ಟೀಕೆ ವ್ಯಕ್ತವಾಗಿದೆ. ಅಮೆರಿಕ ಇದಕ್ಕೆ ಹೊಣೆ ಹೊತ್ತಿಲ್ಲದಿದ್ದರೂ, ವಿಚಾರಣೆ ನಡೆಯುತ್ತಿದೆ.
ಇರಾನ್ ಅಧ್ಯಕ್ಷ ಮಸೌದ್ ಪೆಜೆಶ್ಕಿಯಾನ್ ಇಸ್ರೇಲ್ ಮತ್ತು ಅಮೆರಿಕದೊಂದಿಗೆ ನಡೆಯುತ್ತಿರುವ ಯುದ್ಧದ ವೇಳೆ ನಡೆದ ದಾಳಿಗಳ ಬಗ್ಗೆ ನೆರೆ ರಾಷ್ಟ್ರಗಳಿಗೆ ಕ್ಷಮೆ ಕೇಳಿದರು. ನೆರೆ ದೇಶಗಳಿಂದ ದಾಳಿ ನಡೆಯದ ಹೊರತು ಅವುಗಳನ್ನು ಗುರಿಯಾಗಿಸುವುದಿಲ್ಲ ಎಂದು ಅವರು ಹೇಳಿದರು.
ಅಪಾರ ನಾಶ, ಸಾವು – ನೋವು
ಅಧಿಕೃತ ಮಾಹಿತಿಯ ಪ್ರಕಾರ, ಇರಾನ್ನಲ್ಲಿ ಕನಿಷ್ಠ 1,230 ಮಂದಿ, ಲೆಬನಾನ್ನಲ್ಲಿ 200ಕ್ಕೂ ಹೆಚ್ಚು ಮಂದಿ ಮತ್ತು ಇಸ್ರೇಲ್ನಲ್ಲಿ ಸುಮಾರು ಡಜನ್ ಮಂದಿ ಮೃತಪಟ್ಟಿದ್ದಾರೆ. ಜೊತೆಗೆ ಆರು ಅಮೆರಿಕದ ಸೈನಿಕರೂ ಅಸುನೀಗಿದ್ದಾರೆ.
150ಕ್ಕೂ ಹೆಚ್ಚು ಇರಾನ್ ನಾಗರಿಕರು ಅದರಲ್ಲೂ ರಾಜತಾಂತ್ರಿಕರು ಮತ್ತು ಅವರ ಕುಟುಂಬ ಸದಸ್ಯರು ಲೆಬನಾನ್ ತೊರೆದಿದ್ದಾರೆ ಎಂದು ಹಿರಿಯ ಲೆಬನಾನ್ ಭದ್ರತಾ ಮೂಲ ತಿಳಿಸಿದೆ. ಇಸ್ರೇಲ್ ಸೇನೆ ಲೆಬನಾನ್ನಲ್ಲಿರುವ ಇರಾನ್ ಪ್ರತಿನಿಧಿಗಳನ್ನು ಬೆದರಿಕೆ ಹಾಕಿ, ರಾಯಭಾರ ಕಚೇರಿಯ ಸಮೀಪ ದಾಳಿಗಳನ್ನು ನಡೆಸಿದ ಬಳಿಕ ಈ ನಿರ್ಧಾರ ಕೈಗೊಳ್ಳಲಾಗಿದೆ.
ಯುದ್ಧದ ಆರಂಭಿಕ ದಿನಗಳಲ್ಲಿ ಜೋರ್ಡಾನ್ನ ಮುವಾಫಾಕ್ ಸಾಲ್ಟಿ ವಾಯುನೆಲೆಯಲ್ಲಿ ಯುಎಸ್ ಥಾಡ್ ಕ್ಷಿಪಣಿ ರಕ್ಷಣಾ ವ್ಯವಸ್ಥೆಗಳು ಬಳಸುವ ಆರ್ಟಿಎಕ್ಸ್ ಕಾರ್ಪ್ ಎಎನ್/ಟಿಪಿವೈ-2 ರಾಡಾರ್ ಮತ್ತು ಬೆಂಬಲ ಉಪಕರಣಗಳನ್ನು ನಾಶಪಡಿಸಲಾಗಿರುವುದನ್ನು ಉಪಗ್ರಹ ಫೋಟೋಗಳು ತೋರಿಸುತ್ತವೆ ಎಂದು ವಾಣಿಜ್ಯ ಉಪಗ್ರಹ ಚಿತ್ರಣವನ್ನು ಉಲ್ಲೇಖಿಸಿ ಸಿಎನ್ಎನ್ ಈ ಹಿಂದೆ ವರದಿ ಮಾಡಿತ್ತು. ಉಪಕರಣಗಳ ನಾಶದ ನಂತರ ಅಮೆರಿಕದ ಅಧಿಕಾರಿಯೊಬ್ಬರು ಈ ಮಾಹಿತಿಯನ್ನು ದೃಢಪಡಿಸಿದರು.
ಥಾಡ್ ರಾಡಾರ್ ಮೇಲೆ ಇರಾನಿನ ದಾಳಿಯು ಇರಾನ್ನ ಇದುವರೆಗಿನ ಅತ್ಯಂತ ಯಶಸ್ವಿ ದಾಳಿಗಳಲ್ಲಿ ಒಂದಾಗಿದೆ ಎಂದು ಫೌಂಡೇಶನ್ ಫಾರ್ ದಿ ಡಿಫೆನ್ಸ್ ಆಫ್ ಡೆಮಾಕ್ರಸೀಸ್ನಲ್ಲಿ ಮಿಲಿಟರಿ ಮತ್ತು ರಾಜಕೀಯ ಶಕ್ತಿಯ ಕೇಂದ್ರದ ಉಪ ನಿರ್ದೇಶಕ ರಯಾನ್ ಬ್ರೋಬ್ಸ್ಟ್ ಹೇಳಿದ್ದಾರೆ.