ಪೇಟೆಯಲ್ಲಿ ದಾಂಧಲೆ ಎಬ್ಬಿಸಿದ ಕೋಣನಿಂದ ಹಲವರಿಗೆ ಗಾಯ
ಕಾಸರಗೋಡು : ವಧಿಸಲು ಒಯ್ಯುತ್ತಿದ್ದವನನ್ನು ಕೋಣ ಕೊಂಬಿನಿಂದ ತಿವಿದು ಕೊಂದಿರುವ ಘಟನೆಯೊಂದು ಕಾಸರಗೋಡು ಸಮೀಪದ ಮೊಗ್ರಾಲ್‌ ಪುತ್ತೂರು ಎಂಬಲ್ಲಿ ಸಂಭವಿಸಿದೆ. ಈ ಘಟನೆಯ ವೀಡಿಯೊ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಅಗಿದೆ.
ಲಾರಿಯಿಂದ ಇಳಿಸುತ್ತಿರುವಾಗ ರೊಚ್ಚಿಗೆದ್ದ ಕೋಣ ಹಗ್ಗ ಕಡಿದುಕೊಂಡು ಯುವಕನನ್ನು ಒಂದಷ್ಟು ದೂರ ಎಳೆದುಕೊಂಡು ಹೋಗಿ ಕೊಂಬಿನಿಂದ ತಿವಿದಿದೆ. ಗಂಭೀರವಾಗಿ ಗಾಯಗೊಂಡ ಯುವಕ ಚಿಕಿತ್ಸೆ ಫಲಿಸದೆ ಸಾವಿಗೀಡಾಗಿದ್ದಾನೆ. ಮೃತ ಯುವಕನನ್ನು ಮೂಲತಃ ಕರ್ನಾಟಕದ ಚಿತ್ರದುರ್ಗದ ಸಾದಿಕ್‌ (22) ಎಂದು ಗುರುತಿಸಲಾಗಿದೆ.
ಹಗ್ಗದಿಂದ ಬಿಡಿಸಿಕೊಂಡ ಕೋಣ ಭಾರಿ ದಾಂಧಲೆ ಎಬ್ಬಿಸಿದ್ದು, ಸಾದಿಕ್‌ನ ತಂದೆಗೂ ಗಾಯವಾಗಿದೆ. ಚಿತ್ರದುರ್ಗದಿಂದಲೇ ಈ ಕೋಣವನ್ನು ಮಾಂಸಕ್ಕಾಗಿ ವಧಿಸಲು ತರಲಾಗಿತ್ತು. ಕೋಣ ಮೊಗ್ರಾಲ್‌ ಪೇಟೆಯಲ್ಲಿ ಸುಮಾರು 4 ಕಿ. ಮೀ. ಓಡಾಡಿ ಭಾರಿ ನಾಶನಷ್ಟವುಂಟು ಮಾಡಿದೆ. ಓರ್ವ ಬಾಲಕನನ್ನು ಗಾಯಗೊಳಿಸಿ, ಒಂದು ಬೇಕರಿಗೆ ನುಗ್ಗಿ ದಾಂಧಲೆ ಮಾಡಿದೆ. ಕೋಣವನ್ನು ಹಿಡಿಯಲು ಪ್ರಯತ್ನಿಸಿದ ಕೆಲವು ಮಂದಿಗೆ ಗಾಯವಾಗಿದೆ. ಕೊನೆಗೆ ಕೋಣವನ್ನು ಹಿಡಿಯಲು ಪೊಲೀಸರು ಮತ್ತು ಅಗ್ನಿಶಾಮಕ ಪಡೆಯವರು ಬರಬೇಕಾಯಿತು.
