ಕಡಬ: ಭಾರತೀಯ ಸೇನೆಯ ಮದ್ರಾಸ್ ಎಂಜಿನಿಯರಿಂಗ್ ಗ್ರೂಪ್ ಸೆಂಟರ್ ನಲ್ಲಿ ತರಬೇತಿ ಪಡೆದು 13 ವರ್ಷ ಎಂಜಿನಿಯರ್ ರೆಜಿಮೆಂಟ್ ನಲ್ಲಿ ಸುದೀರ್ಘ 24 ವರ್ಷಗಳ ಕಾಲ ಸೇವೆ ಸಲ್ಲಿಸಿರುವ ಕಡಬ ಅಮೈ ನಿವಾಸಿ ಹವಾಲ್ದಾರ್ ತಿರುಮಲೇಶ್ವರ ಎ.ಎಸ್. ಅವರು ಜ.31 ರಂದು ಸೇವೆಯಿಂದ ನಿವೃತ್ತಿ ಹೊಂದಲಿದ್ದಾರೆ.
ತಿರುಮಲೇಶ್ವರ ಅವರು 2000ನೇ ಇಸವಿಯಲ್ಲಿ ಬೆಂಗಳೂರಿನಲ್ಲಿ ಸೇನೆಗೆ ನೇಮಕಗೊಂಡು ಬಳಿಕ ರಾಜಸ್ಥಾನ, ಗುಜರಾತ್, ಲೇಹ್‍ (ಜಮ್ಮು ಕಾಶ್ಮೀರ), ಅಂಧ್ರಪ್ರದೇಶ, ಅಸ್ಸಾಂ, ಪಶ್ಚಿಮ ಬಂಗಾಲ, ಜಮ್ಮು ಕಾಶ್ಮೀರದ ಶ್ರೀನಗರದಲ್ಲಿ ಸೇವೆ ಸಲ್ಲಿಸಿದ್ದಾರೆ. ಅಪರೇಶನ್ ಪರಾಕ್ರಮ ಕಾರ್ಯಾಚರಣೆಯಲ್ಲಿ ಭಾಗವಹಿಸಿರುವ ಅವರು ಯುನೈಟೆಡ್ ನೇಶನ್ಸ್ ಮಿಷನ್ ಅಡಿಯಲ್ಲಿ ದಕ್ಷಿಣ ಆಫ್ರಿಕಾದ ದಕ್ಷಿಣ ಸುಡಾನ್‍ ನಲ್ಲಿ 9 ತಿಂಗಳ ಕಾಲ ವಿಶೇಷ ಸೇವೆ ಸಲ್ಲಿಸಿದ್ದಾರೆ.
ಕಡಬ ಅಮೈ ದಿವಂಗತ ಶಿವಣ್ಣ ಗೌಡ ಹಾಗೂ ಕಮಲಾ ದಂಪತಿ ಪುತ್ರರಾಗಿರುವ ಅವರು ಪತ್ನಿ ಚಂದ್ರಕಲಾ, ಪುತ್ರಿ ಖುಶಿ ಎ.ಟಿ. ಹಾಗೂ ಪುತ್ರ ಪುಣ್ಯಾಂಕ್‍ ಎ.ಟಿ. ಜತೆ ಅಮೈಯಲ್ಲಿ ನೆಲೆಸಿದ್ದಾರೆ.
