ನಡುರಸ್ತೆಯಲ್ಲಿ ನಿಂತಿದ್ದ ವ್ಯಕ್ತಿಯೋರ್ವರಿಗೆ ಬೈಕಿನಲ್ಲಿ ಬಂದ ನಾಲ್ವರ ತಂಡ ಗುಂಡು ಹಾರಿಸಿದ್ದು, ಇದೇ ಸಂದರ್ಭ ಪಕ್ಕದ ಮನೆಯ ಮಹಿಳೆಯೋರ್ವರು ಕೋಲು ಹಿಡಿದು ಓಡಿಸಿದ ಘಟನೆ ನಡೆದಿದೆ.
ಹರ್ಯಾಣದ ಭಿವಾನಿ ಜಿಲ್ಲೆಯಲ್ಲಿ ಘಟನೆ ನಡೆದಿದ್ದು, ಇದರ ವೀಡಿಯೋ ಇದೀಗ ವೈರಲ್ ಆಗಿದೆ.
ನವಂಬರ್ 27ರಂದು ಘಟನೆ ನಡೆದಿದೆ. ಘಟನೆಯ ವೀಡಿಯೋ ಇದೀಗ ಸಕ್ಕತ್ ವೈರಲ್ ಆಗಿದೆ. ಮಹಿಳೆಯ ಧೈರ್ಯಕ್ಕೆ ಶ್ಲಾಘನೆಯೂ ವ್ಯಕ್ತವಾಗಿದೆ.
58 ಸೆಕೆಂಡಿನ ಈ ವೀಡಿಯೋದಲ್ಲಿ, ವ್ಯಕ್ತಿಯೋರ್ವರು ಮನೆ ಹೊರಗಡೆ ರಸ್ತೆ ಬದಿಯಲ್ಲಿ ನಿಂತಿರುವ ದೃಶ್ಯ ಕಾಣುತ್ತದೆ. ಅಷ್ಟರಲ್ಲಿ ಎರಡು ಬೈಕಿನಲ್ಲಿ ಆಗಮಿಸಿದ ತಂಡ ತಮ್ಮಲ್ಲಿದ್ದ ಗನ್’ನಿಂದ ಫೈರ್ ಮಾಡುತ್ತಾರೆ. ಆ ವ್ಯಕ್ತಿ ಓಡಿ ಹೋಗಿ ಮನೆಯೊಳಗಡೆ ಅವಿತುಕೊಳ್ಳುತ್ತಾನೆ. ಆತನಿಗೆ ಗುಂಡೇಟು ತಗುಲಿದೆಯೇ ಎಂಬ ಬಗ್ಗೆ ಮಾಹಿತಿ ಇಲ್ಲ.
ಆದರೆ ಅಷ್ಟರಲ್ಲಿ ಪಕ್ಕದ ಮನೆಯಿಂದ ಓಡಿ ಬರುವ ಮಹಿಳೆ, ಕೋಲು ಹಿಡಿದುಕೊಂಡು ತಂಡವನ್ನು ಬೆದರಿಸುತ್ತಾಳೆ. ತಂಡದ ಒಬ್ಬಾತ ಶೂಟ್ ಮಾಡಲು ಪ್ರಯತ್ನಿಸಿದರೂ, ವಿಫಲನಾಗುತ್ತಾನೆ. ಮಾತ್ರವಲ್ಲ, ಅಲ್ಲಿಂದ ಕಾಲ್ಕಿಳ್ಳುತ್ತಾನೆ. ತಂಡವೂ ಓಡಿ ತಪ್ಪಿಸಿಕೊಳ್ಳುತ್ತದೆ.