ಪುತ್ತೂರು: ಒಕ್ಕಲಿಗ ಗೌಡ ಮಾತೃ ಸೇವಾ ಸಂಘ, ಯುವ ಒಕ್ಕಲಿಗ ಗೌಡ ಸೇವಾ ಸಂಘ ಹಾಗೂ ಮಹಿಳಾ ಒಕ್ಕಲಿಗ ಗೌಡ ಸೇವಾ ಸಂಘ ಶಾಂತಿಗೋಡು ಇದರ ವಾರ್ಷಿಕ ಸಭೆ ಜ.26 ರಂದು ರಾಮಣ್ಣ ಗೌಡ ಓಲಾಡಿ ಅವರ ಮನೆಯಲ್ಲಿ ನಡೆಯಿತು.
ಸಮಾಜ ಗಟ್ಟಿಯಾಗಬೇಕಾದರೆ ಸಂಘಟನೆ ಬಲಿಷ್ಠವಾಗಬೇಕು : ಮೋಹನ್ ಗೌಡ ಪಾದೆ
ಸಭೆಯನ್ನು ಉದ್ದೇಶಿಸಿ ಪ್ರಾಸ್ತಾವಿಕವಾಗಿ ಮಾತನಾಡಿದ ಮುಂಡೂರು ವಲಯ ಒಕ್ಕಲಿಗ ಗೌಡ ಸೇವಾ ಸಂಘದ ಗೌರವಾಧ್ಯಕ್ಷ ಮೋಹನ್ ಗೌಡ ಪಾದೆ, ನಮ್ಮ ಗೌಡ ಸಮಾಜವು ಹಲವು ಕ್ಷೇತ್ರಗಳಲ್ಲಿ ನಿರ್ಣಾಯಕವಾಗಿದೆ. ನಮ್ಮ ಸಮಾಜ ಗಟ್ಟಿಯಾಗಬೇಕಾದರೆ ಮೊದಲು ನಮ್ಮ ಸಂಘಟನೆಯು ಬಲಿಷ್ಠವಾಗಬೇಕು. ಸಂಘಟನೆಯ ಮುಖಾಂತರ ಗೌಡ ಸಮಾಜ ಮುಂದಕ್ಕೆ ಸಾಗಲಿ ಎಂದು ತಿಳಿಸಿದರು.
ಸಭೆಯಲ್ಲಿ ಕ್ರೀಡಾ ಕ್ಷೇತ್ರದಲ್ಲಿ ಸಾಧನೆಗೈದ ಕುಮಾರಿ ಹಾರ್ದಿಕ ಪಿ. ಹಾಗೂ ಶೈಕ್ಷಣಿಕ ಕ್ಷೇತ್ರದಲ್ಲಿ ಸಾಧನೆಗೈದ ಪ್ರಪುಲ್ಲ ಗಣೇಶ್ ಅವರ ಅನುಪಸ್ಥಿತಿಯಲ್ಲಿ ಗಣೇಶ್ ಗೌಡ ಕೈಂದಾಡಿ ಅವರನ್ನು ಸನ್ಮಾನಿಸಲಾಯಿತು. 90 ವರ್ಷ ಮೇಲ್ಪಟ್ಟ ಹಿರಿಯರನ್ನ ಗುರುತಿಸಿ ಸನ್ಮಾನಿಸಿದ್ದು ಗಮನಸೆಳೆಯಿತು.
ನಾವು ಒಕ್ಕಲಿಗರು ನಮ್ಮದು ಸ್ವಾಭಿಮಾನದ ಬದುಕು :ಎ.ವಿ.ನಾರಾಯಣ ಗೌಡ
ಅತಿಥಿಯಾಗಿ ಮಾತನಾಡಿದ ಎ.ವಿ.ಜಿ ಇಂಗ್ಲೀಷ್ ಮೀಡಿಯಂ ಸ್ಕೂಲಿನ ಸಂಚಾಲಕ ಎ.ವಿ. ನಾರಾಯಣ ಗೌಡ, ಗೌಡ ಸಮಾಜವು ಅತಿ ಹಳೆಯ ಇತಿಹಾಸ ಹೊಂದಿರುವಂತಹ ಸಮಾಜ. ಒಕ್ಕಲಿಗರದ್ದು ಸ್ವಾಭಿಮಾನದ ಬದುಕು. ನಮ್ಮ ಸಮಾಜದ ಅನೇಕ ರಾಜರು ಈ ರಾಜ್ಯವನ್ನು ಆಳಿದ್ದಾರೆ. ರಾಜ್ಯಕ್ಕೆ ಅತಿ ಹೆಚ್ಚು ಮುಖ್ಯ ಮಂತ್ರಿಗಳನ್ನು ನೀಡಿದ ಗೌರವ ನಮ್ಮ ಸಮಾಜಕ್ಕೆ ಇದೆ ಎಂದು ಹೇಳಿದರು.
ಉನ್ನತ ವಿದ್ಯಾಭ್ಯಾಸದ ಕಡೆಗೆ ಇರಲಿ ಯುವಕರ ಗಮನ : ಅಮರನಾಥ ಗೌಡ
ಪುತ್ತೂರು ಒಕ್ಕಲಿಗ ಗೌಡ ಯುವ ಸೇವಾ ಸಂಘದ ಅಧ್ಯಕ್ಷ ಅಮರನಾಥ ಗೌಡ ಬಪ್ಪಳಿಗೆ ಮಾತನಾಡಿ. ನಮ್ಮ ಸಮಾಜದ ಯುವಕರು ಉನ್ನತ ವಿದ್ಯಭ್ಯಾಸದ ಕಡೆ ಹೆಚ್ಚಿನ ಗಮನಕೊಡಬೇಕು. ಚಟಗಳಿಗೆ ದಾಸರಾಗುವುದಕ್ಕಿಂತ ವಿದ್ಯೆಗೆ ದಾಸರಾಗಿ, ವಿದ್ಯೆ ಗೌರವದ ಜೀವನ ಕಲ್ಪಿಸುತ್ತದೆ ಎಂದರು.
ಪುತ್ತೂರು ಒಕ್ಕಲಿಗ ಗೌಡ ಸೇವಾ ಸಂಘದ ಅಧ್ಯಕ್ಷ ರವಿ ಮುಂಗ್ಲಿ ಮನೆ ಮಾತನಾಡಿ, ಪ್ರತಿ ಊರಿನ ಗೌಡ ಸಮಾಜವು ಅಭಿವೃದ್ಧಿ ಹೊಂದಲು ತಾಲೂಕಿನ ಗೌಡ ಸೇವಾ ಸಂಘವು ಸಹಕಾರ ನೀಡುತ್ತೆ, ನಮ್ಮ ಸಂಘದಿಂದ ಸಾಕಷ್ಟು ಸೌಲಭ್ಯಗಳು ಉಂಟು. ಅದರ ಪ್ರಯೋಜನವನ್ನು ಎಲ್ಲರು ಪಡೆಯಬೇಕು ಎಂದರು.
ಕುಲಕಸುಬು ಮರೆಯದಿರಿ : ಗಣೇಶ್ ಗೌಡ ಕೈಂದಾಡಿ
ಒಕ್ಕಲಿಗ ಗೌಡ ಸೇವಾ ಸಂಘದ ಅಧ್ಯಕ್ಷ ಗಣೇಶ್ ಗೌಡ ಕೈಂದಾಡಿ ಮಾತನಾಡಿ, ಒಕ್ಕಲಿಗರ ಕುಲ ಕಸುಬು ಕೃಷಿ. ಇದನ್ನೇ ನಂಬಿ ಬದುಕಿದ ಸಮಾಜ ನಮ್ಮದು. ಕೃಷಿ ಇಂದು ಆಧುನಿಕರಣಗೊಳ್ಳುತ್ತಿದೆ. ಇದನ್ನ ಅಳವಡಿಸಿ ಕೊಂಡು ನಮ್ಮ ಸಮಾಜದ ಕೃಷಿಕರು ಮುಂದಕ್ಕೆ ಸಾಗಬೇಕು ಎಂದು ಹೇಳಿದರು.
ವೇದಿಕೆಯಲ್ಲಿ ಚೆನ್ನಪ್ಪ ಗೌಡ ಕೋಲಾಡಿ, ರಾಮಣ್ಣ ಗೌಡ ಓಲಾಡಿ, ಊರ ಗೌಡರಾದ ದೇವಪ್ಪ ಗೌಡ ಓಲಾಡಿ, ಶಿವರಾಮ ಗೌಡ ಪಾಣಂಬು, ಆನಂದ ಗೌಡ ಬೊಳ್ಳಮೆ ಹಾಗೂ ಪದಾಧಿಕಾರಿಗಳಾದ ಸಂದೀಪ್ ಗೌಡ ಕಕ್ವೆ, ಜ್ಯೋತಿ ಚೆನ್ನಪ್ಪ ಗೌಡ ಉಪಸ್ಥಿತರಿದ್ದರು.
ಪ್ರಧಾನ ಕಾರ್ಯದರ್ಶಿ ವಿನೋದ್ ಓಲಾಡಿ ವಾರ್ಷಿಕ ವರದಿ ಒಪ್ಪಿಸಿದರು. ಸಂಘದ ಕೋಶಾಧಿಕಾರಿ ಹರೀಶ್ ಕರ್ಬಂಡ್ಕ ಸ್ವಾಗತಿಸಿ, ಮಹಿಳಾ ಸಂಘದ ಅಧ್ಯಕ್ಷೆ ಜ್ಯೋತಿ ಚೆನ್ನಪ್ಪ ಗೌಡ ಕರ್ಬಂಡ್ಕ ವಂದಿಸಿದರು. ಒಕ್ಕಲಿಗ ಯುವ ಸಂಘದ ಪ್ರಧಾನ ಕಾರ್ಯದರ್ಶಿ ಚಿರಂಜೀವಿ ತೋಟ, ಕ್ರೀಡಾ ಕಾರ್ಯದರ್ಶಿ ರಿತೇಶ್ ಹಾಗೂ ಪಧಾದಿಕಾರಿಗಳು ಸಹಕರಿಸಿದರು. ಕಾವ್ಯ ಕೈಂದಾಡಿ ಪ್ರಾರ್ಥನೆ ಹಾಡಿದರು. ಒಕ್ಕಲಿ ಗೌಡ ಸಂಘ ಮುಂಡೂರು ವಲಯದ ಪ್ರಧಾನ ಕಾರ್ಯದರ್ಶಿ ವರುಣ್ ಓಲಾಡಿ ಕಾರ್ಯಕ್ರಮ ನಿರೂಪಿಸಿದರು.