ಬಳ್ಳಾರಿಗೆ ಕರೆದೊಯ್ಯುವಾಗ ಕೂಲಿಂಗ್‌ ಧರಿಸಲು ಅವಕಾಶ ಕೊಟ್ಟ ಆರೋಪ
ಬೆಂಗಳೂರು : ಕೊಲೆ ಆರೋಪಿ ದರ್ಶನ್‌ಗೆ ಸಂಬಂಧಿಸಿದಂತೆ ಪೊಲೀಸ್‌ ಅಧಿಕಾರಿಗಳಿಗೆ ಕಂಟಕ ತಪ್ಪುತ್ತಿಲ್ಲ. ಬೆಂಗಳೂರಿನ ಪರಪ್ಪನ ಅಗ್ರಹಾರ ಜೈಲಿನಲ್ಲಿ ಐಷಾರಾಮಿ ಸೌಲಭ್ಯ ಅನುಭವಿಸಿದ ಕಾರಣಕ್ಕೆ ನಟನನ್ನು ನಿನ್ನೆ ನಸುಕಿನ ಹೊತ್ತು ಬಳ್ಳಾರಿ ಜೈಲಿಗೆ ಸ್ಥಳಾಂತರಿಸಲಾಗಿದೆ. ವಿಐಪಿ ಸೌಲಭ್ಯಕ್ಕೆ ಅವಕಾಶ ಮಾಡಿಕೊಟ್ಟ ಬೆಂಗಳೂರಿನ 9 ಜೈಲು ಅಧಿಕಾರಿಗಳು ಅಮಾನತಾಗಿ ಶಿಸ್ತು ಕ್ರಮ ಎದುರಿಸುತ್ತಿದ್ದಾರೆ. ಈಗ ಬಳ್ಳಾರಿ ಜೈಲಿಗೆ ಕರೆದುಕೊಂಡು ಹೋದ ಪೊಲೀಸ್‌ ಅಧಿಕಾರಿಗೂ ದರ್ಶನ್‌ ಕಾರಣದಿಂದ ಕಂಟಕ ಎದುರಾಗಿದೆ.
ಬಳ್ಳಾರಿ ಜೈಲಿಗೆ ದರ್ಶನ್‌ ಹೋಗುತ್ತಿರುವ ಫೋಟೊ ಮತ್ತು ವೀಡಿಯೊಗಳು ಎಲ್ಲೆಡೆ ವೈರಲ್‌ ಆಗಿದೆ. ದರ್ಶನ್‌ ಬೆಲೆಬಾಳುವ ಟಿ-ಶರ್ಟ್‌, ಜೀನ್ಸ್‌ ಪ್ಯಾಂಟ್‌, ಶೂ ಧರಿಸಿದ್ದ. ಜೊತೆಗೆ ಕೂಲಿಂಗ್‌ ಗ್ಲಾಸ್‌ ಕೂಡ ಇತ್ತು. ಈಗ ಈ ಕೂಲಿಂಗ್‌ ಗ್ಲಾಸ್‌ನಿಂದಾಗಿ ಅಧಿಕಾರಿಗೆ ಸಮಸ್ಯೆ ಉಂಟಾಗಿದೆ.
ಬೆಂಗಳೂರಿನಿಂದ ಬಳ್ಳಾರಿಗೆ ಕರೆದುಕೊಂಡು ಹೋಗುವಾಗ ಭದ್ರತೆಯ ಉಸ್ತುವಾರಿ ಹೊಂದಿದ್ದ ಅಧಿಕಾರಿ ವಿರುದ್ಧ ಕೂಲಿಂಗ್‌ ಗ್ಲಾಸ್‌ ಧರಿಸಲು ಅವಕಾಶ ಮಾಡಿಕೊಟ್ಟಿರುವುದಕ್ಕೆ ಶಿಸ್ತಕ್ರಮ ಪ್ರಾರಂಭಿಸಲಾಗಿದೆ. ಪೊಲೀಸ್‌ ವಾಹನದಿಂದ ಇಳಿಯುವಾಗ ಕೂಲಿಂಗ್‌ ಗ್ಲಾಸನ್ನು ನಟ ಎದೆಭಾಗದಲ್ಲಿ ಟಿ-ಶರ್ಟ್‌ಗೆ ಸಿಕ್ಕಿಸಿಕೊಂಡಿದ್ದ. ಇದು ಫೋಟೊ ಮತ್ತು ವೀಡಿಯೊದಲ್ಲಿ ಸ್ಪಷ್ಟವಾಗಿ ಕಾಣಿಸುತ್ತಿದೆ.
ಇದು ಕೂಲಿಂಗ್‌ ಗ್ಲಾಸ್‌ ರೀತಿ ಕಾಣಿಸುತ್ತಿರುವ ಪವರ್‌ ಗ್ಲಾಸ್‌. ಕೈದಿಗಳು ಕಣ್ಣಿನ ಸಮಸ್ಯೆ ಇದ್ದರೆ ಪವರ್‌ ಗ್ಲಾಸ್‌ ಧರಿಸುವುದಕ್ಕೆ ಕಾನೂನಿನಲ್ಲಿ ಅವಕಾಶ ಇದೆ ಎಂದು ಜೈಲು ಅಧಿಕಾರಿಗಳು ಸ್ಪಷ್ಟನೆ ನೀಡಿದ್ದಾರೆ.