ಪುತ್ತೂರು: ಇಲ್ಲಿಯ ಕೊಂಬೆಟ್ಟು ಬಳಿ ಭಾನುವಾರ ನಸುಕಿನ ವೇಳೆ ಅಪರಿಚಿತರು ಮೂರು ಮನೆಗಳ ಬಾಗಿಲು ಬಡಿದು ಆತಂಕದ ವಾತವಾರಣ ಸೃಷ್ಟಿಸಿದ ಘಟನೆ ನಡೆದಿದೆ.
ಭಾನುವಾರ ಬೆಳಿಗ್ಗೆ ಸುಮಾರು 5.30ರ ಹೊತ್ತಿಗೆ ಇಬ್ಬರು ಅಪರಿಚಿತರು ಮೂರು ಮನೆಗಳ ಬಾಗಿಲು ಬಡಿದು ಮನೆಯ ಸುತ್ತಾಮುತ್ತಾ ಓಡಾಡಿದ್ದಾರೆ. ಇದನ್ನು ಗಮನಿಸಿದ ಮನೆಯವರು ಹಿಡಿಯಲು ಹೋದಾಗ ಹಲ್ಲೆಗೆ ಮುಂದಾಗಿದ್ದಾರೆ ಎನ್ನಲಾಗಿದೆ.
ಈ ಕುರಿತು ಮನೆಯ ಪ್ರವೀಣ್ ರಾವ್ ನಗರ ಪೊಲೀಸ್ ಠಾಣೆಗೆ ಮಾಹಿತಿ ನೀಡಿದ್ದಾರೆ. ಜತೆಗೆ ಸ್ಥಳೀಯ ನಗರಸಭಾ ಸದಸ್ಯರಿಗೂ ಮಾಹಿತಿ ನೀಡಿದ್ದಾರೆ. ತಕ್ಷಣ ಸ್ಥಳಕ್ಕೆ ದೌಡಾಯಿಸಿದ ನಗರ ಸಭಾ ಸದಸ್ಯರೊಂದಿಗೆ ಸ್ಥಳೀಯರಾದ ಪ್ರವೀಣ್ ಹಾಗೂ ಜನಾರ್ದನ ಮೊದಲಾದವರು ಅಪರಿಚಿತರಿಗಾಗಿ ಶೋಧ ನಡೆಸಿದ್ದಾರೆ. ಈ ವೇಳೆ ತಾಲೂಕು ಕ್ರೀಡಾಂಗಣದ ಬಳಿ ಈ ಪೈಕಿ ಸಾಲೆತ್ತೂರು ಮೂಲದ ಓರ್ವ ವ್ಯಕ್ತಿ ಓಡುತ್ತಿರುವುದು ಪತ್ತೆಯಾಗಿದ್ದು, ಅವನನ್ನು ಸ್ಥಳೀಯರು ಹಾಗೂ ಕ್ರೀಡಾಂಗಣದಲ್ಲಿ ವ್ಯಾಯಾಮ ಮಾಡುತ್ತಿದ್ದ ನಗರ ಠಾಣಾ ಕಾನ್ ಸ್ಟೇಬಲ್ ಗಳ ಸಹಾಯದಿಂದ ಹಿಡಿದು ನಗರ ಠಾಣೆಗೆ ಒಪ್ಪಿಸಲಾಗಿದೆ. ಪ್ರಕರಣದಕುರಿತು ತನಿಖೆ ನಡೆಯುತ್ತಿದೆ ಎಂದು ತಿಳಿದು ಬಂದಿದೆ.
