ಹಿಮಾದಾಸ್- ಭಾರತದ ಹೆಮ್ಮೆಯ ಕ್ರೀಡಾಪಟು
ನಾನು ನಿಮಗೆಲ್ಲ ಇಂದು ಒಬ್ಬ ಅದ್ಭುತವಾದ ಮಹಿಳಾ ಕ್ರೀಡಾಪಟುವನ್ನು ಪರಿಚಯ ಮಾಡಬೇಕು ಮತ್ತು ಜಗತ್ತಿನ ಎಲ್ಲ ಮಹಿಳೆಯರಿಗೆ ಅವರದ್ದೇ ದಿನದ ಶುಭಾಶಯ ಹೇಳಬೇಕು.
ಮೀಟ್ ದಿಸ್ ಗ್ರೇಟ್ ಅಥ್ಲೆಟ್!
ಮೊದಲ ಬಾರಿ ರಾಷ್ಟ್ರೀಯ ಕ್ರೀಡಾಕೂಟದಲ್ಲಿ ಓಡುವಾಗ ಅವಳ ಬಳಿ ಟ್ರಾಕ್ ಶೂ ಇರಲಿಲ್ಲ. ಅವಳ ಅಪ್ಪ ಪೇಟೆಗೆ ಹೋಗಿ 1,200 ರೂ. ಬೆಲೆಯ ಸ್ಪೈಕ್ ಇರುವ ಸಾಮಾನ್ಯ ಶೂ ತಂದುಕೊಟ್ಟಿದ್ದರು ಮತ್ತು ನನ್ನ ಹತ್ತಿರ ಇರೋದು ಇಷ್ಟೇ ದುಡ್ಡು ಎಂದು ಮಗಳಿಗೆ ಹೇಳಿದ್ದರು.
ಆಗ ಅವಳು ತನ್ನ ಶೂಗಳ ಮೇಲೆ ಮಾರ್ಕರ್ ಪೆನ್ನನ್ನು ಬಳಸಿ “ಅಡಿಡಾಸ್” ಎಂದು ಬರೆದುಕೊಂಡು ಓಟಕ್ಕೆ ನಿಲ್ಲುತ್ತಿದ್ದರು ಮತ್ತು ಧೈರ್ಯವಾಗಿ ಎಲ್ಲ ಆಟಗಳನ್ನು ಗೆಲ್ಲುತ್ತಿದ್ದರು. ಆದರೆ ಈಗ ಮೂರೂವರೆ ವರ್ಷಗಳಲ್ಲಿ ಆಕೆಯ ಕ್ರೀಡಾ ಪ್ರತಿಭೆಯು ಜಗತ್ತಿಗೆ ಜಾಹೀರು ಆಗಿಬಿಟ್ಟಿದೆ. ಅವಳೀಗ ಭಾರತದ ಸೂಪರ್‌ಸ್ಟಾರ್ ಕ್ರೀಡಾಪಟು. ಅದೇ ಅಡಿಡಾಸ್ ಶೂ ಕಂಪನಿ ಆಕೆಯನ್ನು ತನ್ನ ಬ್ರಾಂಡ್ ಅಂಬಾಸಿಡರ್ ಆಗಿ ಆರಿಸಿಕೊಂಡಿದೆ. ಅವಳ ಹೆಸರಿನಲ್ಲಿ ಆಧುನಿಕ ಶೂಗಳನ್ನು ಲಾಂಚ್ ಮಾಡಿದೆ. ಅದರಲ್ಲಿ ಒಂದು ಕಡೆ ಅವಳ ಹೆಸರಿದ್ದರೆ, ಮತ್ತೊಂದು ಕಡೆ Create History ಎಂದು ಪ್ರಿಂಟ್ ಮಾಡಲಾಗಿದೆ. ಈ ಯಶಸ್ಸಿಗೆ ಕಾರಣವಾದ ಚಿನ್ನದ ಜಿಂಕೆಯ ಹೆಸರು ಹಿಮಾ ದಾಸ್.
ಆಕೆ ನಿಜವಾಗಿಯೂ ದೇಶದ ಹೆಮ್ಮೆಯ ಕ್ರೀಡಾಪಟು
ಆಕೆ ಹುಟ್ಟಿದ ಅಸ್ಸಾಂನ ಸಣ್ಣ ಊರಲ್ಲಿ ಬೇರೆ ಯಾವ ಕ್ರೀಡಾಪಟು ಇರಲಿಲ್ಲ. ಆಟದ ಮೈದಾನ, ಜಿಮ್ ಮೊದಲಾದವುಗಳು ಇರಲೇ ಇಲ್ಲ.
ಆಕೆ ಹುಟ್ಟಿದ್ದು ಅಸ್ಸಾಂ ರಾಜ್ಯದ ಧಿಂಗ್ ಎಂಬ ಪುಟ್ಟ ಪಟ್ಟಣದ ಸಮೀಪದ ಒಂದು ಹಳ್ಳಿಯಲ್ಲಿ. ಆ ಹಳ್ಳಿಯಲ್ಲಿ ಇರುವುದು ಒಟ್ಟು 100 ಮನೆ ಮಾತ್ರ. ಅವರ ತಂದೆ ಒಬ್ಬ ಸಾಮಾನ್ಯ ಕೃಷಿಕ. ಅವರ ಐದು ಮಕ್ಕಳಲ್ಲಿ ಹಿಮಾ ದಾಸ್ ಕೊನೆಯವರು. ಮನೆಯಲ್ಲಿ ಒಟ್ಟಿಗೆ 17 ಜನ. ಕಿತ್ತು ತಿನ್ನುವ ಬಡತನ. ಇಂತಹ ಕುಟುಂಬದ ಓರ್ವ ಹುಡುಗಿ ಮುಂದೆ ವಿಶ್ವಮಟ್ಟದ ಕ್ರೀಡಾಪಟು ಆದದ್ದು ನಿಜವಾಗಿ ಅದ್ಭುತವೇ ಸರಿ.
ಪ್ರೌಢಶಾಲೆ ಕಲಿಯುವಾಗ ಆಕೆಗೆ ಫುಟ್‌ಬಾಲ್‌ನಲ್ಲಿ ಮಾತ್ರ ಆಸಕ್ತಿ ಇತ್ತು ಆದರೆ ಫುಟ್‌ಬಾಲ್ ಆಡುತಿದ್ದದ್ದು ಕೇವಲ ಹುಡುಗರೊಂದಿಗೆ. ಮುಂದೆ ಶಿಮಾಶುಲ್ ಎಂಬ ಒಬ್ಬ ಪಿ. ಟಿ. ಮೇಷ್ಟ್ರು ಅವರಿಗೆ ಅಥ್ಲೆಟಿಕ್ಸ್ ಮೇಲೆ ಮಾತ್ರ ಗಮನಕೊಡಲು ಹೇಳಿದರು. ಇದರಿಂದ ಹದಿನಾರು ವರ್ಷದ ಹಿಮಾ ದಾಸ್ ಟ್ರಾಕ್ ಮೇಲೆ ಓಡಲು ಆರಂಭ ಮಾಡಿದರು. ನಿಪುಣದಾಸ್ ಎಂಬ ಕೋಚ್ ಅವರಿಗೆ ದೊರಕಿದ್ದು, ಪ್ರತಿದಿನ 10-12 ಘಂಟೆ ಬೆವರು ಹರಿಸಿ ದುಡಿದದ್ದು, ಸ್ಪಷ್ಟ ಗುರಿ ಇರಿಸಿ ಯೋಜನೆ ಹಾಕಿದ್ದು ಎಲ್ಲವೂ ಸೇರಿ ಆಕೆಯ ಮೂಲಕ ಬಹು ದೊಡ್ಡ ಫಲಿತಾಂಶವನ್ನು ತಂದುಕೊಟ್ಟವು. ಆಕೆಯ ಸಾಧನೆ ನಿಜಕ್ಕೂ ಅದ್ಭುತ.
ಮನೆಯ ಮಂದಿಯೇ ಆಕೆಗೆ ಕ್ರೀಡೆ ಬೇಟ ಅಂದರು
2018ರಲ್ಲಿ ಆಕೆ ಮೊದಲನೇ ಸಲ ಆಸ್ಟ್ರೇಲಿಯಾದಲ್ಲಿ ಕಾಮನ್‌ವೆಲ್ತ್ ಕ್ರೀಡಾಕೂಟದಲ್ಲಿ ಓಡಿದರು. ಯಾವ ಪದಕವೂ ದೊರೆಯದೆ ಹಿಂದೆ ಬಂದಾಗ ಅಮ್ಮ ಗದರಿ ಹೇಳಿದ್ದು ಒಂದೇ ಮಾತು, ‘ಸಾಕು ಮಗಳೆ ಹೀಗೆಲ್ಲ ಸ್ಪೋರ್ಟ್ಸ್ ಅಂತ ಕೂತರೆ ಮುಂದೆ ಮದುವೆ ಕಷ್ಟ ಆಗಬಹುದು’
ಆದರೆ ದೊಡ್ಡ ಕನಸುಗಳನ್ನು ಹೊತ್ತ ಹುಡುಗಿ ಮಧ್ಯದಲ್ಲಿ ಕ್ವಿಟ್ ಮಾಡಲು ಸಾಧ್ಯವೇ ಇರಲಿಲ್ಲ. ಧಿಂಗ್ ಎಕ್ಸ್‌ಪ್ರೆಸ್ ಇನ್ನಷ್ಟು ವೇಗದಲ್ಲಿ ಓಡಲು ತೊಡಗಿತು.
ಹಿಮಾ ದಾಸ್ ಹೆಸರನ್ನು ಇಡೀ ಜಗತ್ತು ಮೊದಲನೆಯ ಸಲ ಸ್ಪಷ್ಟವಾಗಿ ಕೇಳಿದ್ದು 2018 ಜುಲೈ ತಿಂಗಳಲ್ಲಿ ನಡೆದ ಅಂಡರ್ 19 ವರ್ಲ್ಡ್ ಚಾಂಪಿಯನಷಿಪ್ ಕೂಟದಲ್ಲಿ. ಇವೆಂಟ್ ನಡೆದದ್ದು ದೂರದ ಫಿನ್‌ಲ್ಯಾಂಡ್‌ನಲ್ಲಿ.
ಅದರಲ್ಲಿ ಮಿಂಚಿದ ಅವರು 400 ಮೀಟರ್ ರೇಸನ್ನು 51.46 ಸೆಕೆಂಡ್ಸ್ ಅವಧಿಯಲ್ಲಿ ಮುಗಿಸಿ ಗೆದ್ದದ್ದು ಚಿನ್ನದ ಪದಕ. ಯಾವುದೇ ವಿಶ್ವಮಟ್ಟದ ಕೂಟದಲ್ಲಿ ಚಿನ್ನದ ಪದಕ ಗೆದ್ದ ಮೊದಲನೆಯ ಭಾರತೀಯ ಮಹಿಳೆ ಹಿಮಾ ದಾಸ್ ಎನ್ನುವುದು ಆಕೆಯದೇ ದಾಖಲೆ.
ಈ ಸಾಧನೆಯನ್ನು ಮಾಡಿದಾಗ ಅವರ ವಯಸ್ಸು ಕೇವಲ 18
ಮುಂದಿನ ತಿಂಗಳು ನಡೆದ (ಜಕಾರ್ತಾ) ಏಷ್ಯನ್ ಕೂಟ. ಅದರಲ್ಲಿ 400 ಮೀ. ರೇಸಲ್ಲಿ ಆಕೆ ಬೆಳ್ಳಿ ಪದಕವನ್ನು ಗೆದ್ದರು. ಎರಡು ವಿಭಾಗದ ರಿಲೇಯಲ್ಲೂ ಚಿನ್ನದ ಪದಕವನ್ನು ಬೇಟೆ ಆಡಿದರು. ಅವರ ದಾಖಲೆಗಳು ನಿಜವಾಗಿ ಅದ್ಭುತವಾಗಿವೆ.
2018 ಜುಲೈ ತಿಂಗಳ 19 ದಿನಗಳ ಅವಧಿಯಲ್ಲಿ ಐದು ಅಂತಾರಾಷ್ಟ್ರೀಯ ಚಿನ್ನದ ಪದಕಗಳನ್ನು ಆಕೆ ಗೆದ್ದಿದ್ದಾರೆ. 400 ಮೀಟರ್ ಓಟದಲ್ಲಿ ಭಾರತದ ದಾಖಲೆಯು ಇದುವರೆಗೆ ಅವರ ಹೆಸರಲ್ಲಿಯೇ ಇದೆ (50.79 ಸೆಕೆಂಡ್).
ಕೇವಲ ಹದಿನೆಂಟು ವರ್ಷ ಪ್ರಾಯದಲ್ಲಿ ಭಾರತದ ರಾಷ್ಟ್ರಪತಿಯವರ ಕೈಗಳಿಂದ ಅರ್ಜುನ ಪ್ರಶಸ್ತಿಯನ್ನು ಕೂಡ ಹಿಮಾ ದಾಸ್ ಅವರು ಪಡೆದಿದ್ದಾರೆ. 2019ರಲ್ಲಿ ಅಮಿತಾಬ್ ಬಚ್ಚನ್ ನಡೆಸಿಕೊಡುವ ‘ಕೌನ್ ಬನೆಗಾ ಕರೋಡ್ ಪತಿ’ ಶೋದಲ್ಲಿ ಅವರು ಸೆಲೆಬ್ರಿಟಿ ಅತಿಥಿಯಾಗಿಯೂ ಭಾಗವಹಿಸಿದ್ದಾರೆ.
ಅಸ್ಸಾಂ ಸರಕಾರವು ಅವರಿಗೆ DYSP ಹುದ್ದೆ ನೀಡಿದೆ. ಏಷ್ಯನ್ ಗೇಮ್ಸ್ ಕೂಟದಲ್ಲಿ ಕೂಡ ಎರಡು ಚಿನ್ನದ ಪದಕ ಮತ್ತು ಒಂದು ಬೆಳ್ಳಿಯ ಪದಕಗಳನ್ನು ಅವರು ಈಗಾಗಲೇ ಗೆದ್ದಿದ್ದಾರೆ.
ಅವರ ಆರಾಧ್ಯ ದೇವರಾದ ಸಚಿನ್ ತೆಂಡುಲ್ಕರ್ ಅವರು ಆಕೆಯನ್ನು ಮುಂಬಯಿಗೆ ಕರೆಸಿಕೊಂಡು ಜತೆಯಾಗಿ ಊಟ ಮಾಡಿಸಿ, ಸನ್ಮಾನ ಮಾಡಿ ತಮ್ಮ ಅಭಿನಂದನೆಯನ್ನು ಸಲ್ಲಿಸಿದ್ದರು.
ಹಿಮಾದಾಸ್ ಅವರಿಗೆ ಈಗ ಕೇವಲ 21 ವರ್ಷ. ಅವರಲ್ಲಿ ಇನ್ನೂ ಸಾಕಷ್ಟು ಕ್ರೀಡಾವರ್ಷಗಳು ಬಾಕಿಯಿವೆ. ರೆಕ್ಕೆ ಬಿಚ್ಚಿದ ಕನಸುಗಳು ಕೂಡಾ.
ಆಕೆ ಅಸ್ಸಾಂ ಪೊಲೀಸ್ DYSP ಆಗಿ ಇತ್ತೀಚೆಗೆ ಅಧಿಕಾರ ಸ್ವೀಕಾರ ಮಾಡಿದ್ದಾರೆ. ಅವರ ಬದ್ಧತೆ, ಕ್ಷಮತೆ, ಸಮರ್ಪಣಾ ಭಾವ ಮತ್ತು ರಾಷ್ಟ್ರಪ್ರೇಮ ಇವುಗಳು ಅತ್ಯಂತ ಶ್ಲಾಘನೀಯ.
ಅವರಿಗೆ ಶುಭವಾಗಲಿ.
✒️ರಾಜೇಂದ್ರ ಭಟ್ ಕೆ.
ಜೇಸಿ ರಾಷ್ಟ್ರೀಯ ತರಬೇತಿದಾರರು.